Хөдөө аж ахуйд шинэ арга, технологи нэвтрүүлэх, тус салбарт ажиллаж буй хүний нөөцийн мэдлэг, ур чадварыг нэмэгдүүлэх, чадварлаг боловсон хүчнээр хангах, хөдөө аж ахуй, биологийн шинэ нөөц баялгийг судалж илрүүлэх, ашиглах, хөдөө аж ахуйг механикжуулах, эрчимжүүлэх, хөдөө аж ахуйн бүтээгдэхүүн үйлдвэрлэлийг нэмэгдүүлэхэд тус сургуулийн болоод төгсөгчдийн үүрэг чухал юм. Өнөөдөр дэлхийн хөдөө аж ахуйд тулгарч буй хүндрэл бэрхшээл, монголын хөдөө аж ахуйд тулгамдаж байгаа асуудлуудыг судлах, шийдвэрлэх арга замуудыг эрэлхийлэх, хүрээлэн буй орчин, нийгмийн эрүүл мэнд түүнд хөдөө аж ахуйн салбарын үүрэг нөлөө, улс орны хөгжилд хөдөө аж ахуйн оруулж буй хувь оролцоог бууруулахгүй байх түүний тогтвортой хөгжлийг хангахад ч бидний идэвхтэй үүрэг оролцоог хүлээж байна.     

       МДС нь магистрант, докторант, мэргэжлийн боловсрол эзэмшигч нарт шинжлэх ухаан, судалгааны нарийн арга зүйг эзэмшүүлэх, мэдлэг боловсролоо дээшлүүлэх, шинэ арга, техник технологи эзэмших, үйлдвэрлэлд ажиллах шинэ мэдлэг, дадал олж авахад туслах, аливаа бэрхшээл, тулгамдаж буй асуудлыг зөв оновчтой шийдвэрлэх, дадал чадвартай болгох, асуудалд шинжлэх ухаанчаар хандах, шинийг эрэлхийлсэн, санаачлагч арга барил төлөвшүүлэхийг зорин ажиллаж байна.       

        Дээрх зорилтуудыг хэрэгжүүлэхэд МДС нь дангаар гүйцэтгэж чадахгүй бөгөөд тус сургуульд суралцагч магистрант докторант та бүгдийн өөрсдийн хичээл зүтгэл, тэдгээрийн удирдагч багш нар, нийт ХААИС-ийн эрдэмтэн, профессор багш нарын хамтын оролцоо чухал юм. 

Танд амжилт бүтээл, аз жаргалын дээдийг хүсэн ерөөе.

Захирал, доктор, профессор Б.Баттөр